Na tarifa indexada, o prezo da electricidade varía cada día e é diferente cada hora da xornada. Con esta modalidade, pagas o que custa a electricidade hora a hora, segundo o mercado, no canto de teres unha tarifa fixa.
Máis abaixo atoparás o gráfico cos prezos da enerxía actualizados a diario. En Som Energia temos 3 modalidades de tarifa indexada en función da potencia contratada.
Na parte superior da imaxe podes seleccionar a tarifa que queiras consultar. O máis frecuente en vivendas é contratar a tarifa 2.0TD, a non ser que se precise unha potencia superior á habitual.
2.0TD indexada: para contratos domésticos e empresas cunha potencia contratada de até 15 kW.
3.0TD indexada: tarifa para empresas con potencia de máis de 15 kW.
6.1TD indexada: alta tensión.
Neste gráfico tes información que che axuda a adaptar o teu consumo aos horarios máis económicos.
A seguir podes ver a tendencia dos prezos de hoxe sen impostos.
Os do día seguinte aparecen cada día ás 15.00.
No gráfico podes ver a tendencia dos prezos de cada día hora a hora. Identifica as horas cos prezos máis altos, intermedios e máis económicos. Hai dous elementos que tes que ter en conta: as barras verticais verdes e as liñas horizontais azuis.
Hai 24 barras verticais, unha por cada hora do día.
Se premes cada unha das barras, aparecerá unha fiestra coa data, a hora e o prezo do kWh. Ten en conta que os prezos que ves no gráfico son aproximados; trátase do cálculo máis axustado que podemos facer o día anterior.
Hai algúns custos relacionados con restricións técnicas e outras incidencias que Rede Eléctrica engade máis tarde.
Verás tamén que hai dúas liñas azuis horizontais. Serven para che dar unha idea de cal é a tendencia dos prezos nese momento:
A liña azul continua indica a media de prezos diaria.
A liña azul descontinua indica a media de prezos dos últimos 7 días. Serve para que teñas unha perspectiva de como son os prezos dese día en relación coas últimas 7 xornadas.
Vexamos un exemplo para que poidas empregar o gráfico e aforrar así en electricidade.
Imaxina que tes que pór unha lavadora, mais non é urxente. Prefires facelo no momento máis económico entre hoxe e mañá. Ao consultares o gráfico, comezas mirando as liñas azuis.
Logo miras as columnas verdes. As máis pequenas e de cor máis clara serán as máis económicas do día.
Se che queda algunha dúbida sobre como optimizar a tarifa indexada, sempre nos podes escribir a info@somenergia.coop.
